XX. mendeko Euskararen Corpus estatistikoa

Testuingurua

Irailaren amaieran Donostiako Ertzaintzaren komisaldegian agintaririk ez egoteari buruzkoa.

Irailaren amaieran Donostiako Ertzaintzaren komisaldegian agintaririk ez egoteari buruzkoa, Arabako Foruzaleak Legebiltzar Taldeko M.ª Enriqueta Benito Bengoa andre txit argiak egina.

(Tramitera onartzea)

(05/10.05.02.0165)

Mahaiak, 1996ko urriaren 8an egindako bilkuran, erabaki du tramitera onartzea Herrizaingo-sailburu jaun txit gorenari egindako GALDERA, eta agindu du Eusko Jaurlaritzari eta Erakunde eta Herrizaingoko Legebiltzar Batzordeari bidal dakiela eta Eusko Legebiltzarraren Aldizkari Ofizialean argitara dadila.

Eusko Legebiltzarreko lehendakaria, Joseba Andoni Leizaola Azpiazu.

Eusko Legebiltzarreko Mahaiari M.ª Enriqueta Benito Bengoa Arabako Foruzaleak Taldeko bozeramaileordeak, indarrean dagoen Legebiltzarraren Araudiko 140. artikuluaz baliatuz, Herrizaingo-sailburuari ondorengo galdera aurkezten dio, Erakunde eta Herrizaingoko Legebiltzar Batzordean ahoz erantzuna izan dadin, irailaren amaieran Donostiako Ertzaintzaren komisaldegian agintaririk ez egoteari buruz.

Komunikabideen bitartez jakin dugu irailaren 28an eta 29an aipatu komisaldegia agintaririk gabe egon zela.

Asteburu horretan zehar Donostian hainbat istilu izan ziren, herritarrentzat ondorio larriak ekarri zituztenak.

Benetan esplikaezina da halako egoerak ez aurreikustea eta erantzukizuna duten agintarien gainbegiraketarik ez izatea, gerta daitezkeenak planifikatu eta aurreikuste aldera.

Horregatik guztiagatik galdetzen dugu:

1.- Egia al da Donostiako komisaldegian ez zegoela behar hainbat agintari?
2.- Aurreikusita al zegoen istilurik gerta zitekeela, asteburu gehienetan bezalaxe?
3.- Egia al da agintaririk ez egotearen zioa ofizialetarako lehiaketa izan zela?
4.- Sailak ez al du asmorik aipatu lehiaketak denboran zehar banatzeko, komisaldegien behar bezalako funtzionamenduari eragin ez diezaioten?
5.- Sailak ireki al du ikerketarik aipatu gertakizunak argitze aldera?
6.- Nola justifikatzen du sailak, lehiaketak direla-eta, agintarietako asko lanorduetan ikasten aritzea, edo beren lantokietan ez egotea?

Vitoria-Gasteiz, 1996ko urriak 1.

M.ª Enriqueta Benito Bengoa, Arabako Foruzaleak Taldeko bozeramaileordea.